30 aprel 2009-cu ildə, səhər saat 09:30-da Azərbaycan Dövlət Neft və Sənaye Universitetinin ikinci korpusunda terror hadisəsi baş verib. Hadisə zamanı 12 nəfər öldürülüb, 10 nəfərdən çox insan yaralanıb. Yaralıların üçü xarici vətəndaşdır: onlardan ikisi Sudan, biri isə Suriya vətəndaşıdır.
Bu qətliam Gürcüstan vətəndaşı, 29 yaşlı Fərda Qədirov tərəfindən törədilib. Həmin gün Qədirov universitetə daxil olaraq, qəfildən “Makarov” tipli tapançanı çıxararaq atəş açmağa başlayıb. O, binanın birinci mərtəbəsindən altıncı mərtəbəsinə qalxaraq qarşısına çıxan hər kəsə atəş açırdı. Altıncı mərtəbəyə çatan qatil polis tərəfindən mühasirəyə alındığını görüb, bundan sonra auditoriyaların birində baş nahiyəsinə atəş açaraq intihar edib.
Neft və Sənaye Universitetində törədilən kütləvi qətllə bağlı 2010-cu il aprelin 10-da məhkəmə keçirilib. Məhkəmənin hokmü ilə hadisənin digər iştirakçıları: Nadir Əliyev, Cavidan Amirov və Nəcəf Süleymanov adlı şəxslər ömürlük həbs cəzasına məhkum edilib, Ariz Qabulov isə 11 il azadlıqdan məhrum olunub.
ADNSU-da terror aktının qurbanlarının xatirəsinə memorial quraşdırılıb.
