Hökumət Evi Bakı şəhərinin mərkəzində, Azadlıq meydanında yerləşir. Sovet hakimiyyətinin bütün rəsmi qurumlarını birləşdirən binanın layihəsi rus memarları Lev Rudnev və Vladimir Munts tərəfindən hazırlanmışdır. [Баку исторические и достопримечательные места. Баку-1956]
Binanın inşası 1934-cü ildə başlanılıb, lakin Böyük Vətən müharibəsi (1941-1945) səbəbindən dayandırılıb. Müharibədən sonra binanın tikinti işləri yenidən bərpa edilib. Əsir götürülmüş alman əsgər və zabitləri də binanın inşasına cəlb olunublar. Tikinti işləri 1952-ci ildə bitirilib. [http://irs.gov.az/location/hokumet-evi]
Layihənin ilkin variantında bina 13 mərtəbədən ibarət olmuşdur, lakin maliyyə çatışmazlığı səbəbindən yalnız 10 mərtəbəsi tikilmişdir. Təsdiq olunmuş layihədə başqa bir dəyişiklik də edilmişdir. Belə ki, binanın ilkin formasına yerli memarlıq xüsusiyyətləri əlavə olunur, burada milli tağlar inşa olunur. Binanın tağları, sütunları, sütun tavanlarının zirvələrinin forması Şirvanşahlar sarayının memarlıq üslubundan götürülmüşdür.
[http://medeniyyet.az/page/news/18401/Bakinin-memarliq-incileri:-Hokumet-evi.html?lang=ru]
Hökumət Evinin əsas fasadı dənizə baxır, xalq nümayişlərinin və şənliklərinin keçirildiyi geniş bir meydana çıxır. Abidənin aşağı hissəsində tamaşaçılar üçün çoxsaylı sektorlardan ibarət tribunalar var. [Баку исторические и достопримечательные места. Баку-1956]
1955-ci ildə heykəltaraş Cəlal Qaryağdının yaratdığı V.İ. Leninin abidəsi Hökumət Evinin qarşısında ucaldılmışdı. 1991-ci ildə, Azərbaycan müstəqilliyini bərpa etdikdən sonra abidə ölkənin Dövlət Bayrağı ilə əvəz olunmuşdur. [https://azerhistory.com/?p=5070]
2006-2010-cu illərdə Hökumət Evində təmir işləri aparılmışdır. Bu bina ölkə əhəmiyyətli memarlıq abidələrinin siyahısına daxildir.
[URIS id=123307]
