17 noyabr 1988-ci ildə Bakının Lenin meydanında (indiki Azadlıq meydanı) Qarabağ məsələsində respublika və SSRİ orqanlarının xalqımıza zidd siyasət apardıqlarına görə, cəmiyyətin davamlı mitinqləri başlamışdır. Milli-azadlıq hərəkatı kimi qiymətləndirilən bu mitinqlər sovet hökumətinə qarşı ilk kütləvi etiraz sayılır. Həmin günlərdə meydanda bir milyona yaxın insan toplaşmışdı. Bu mitinqlərdə meydanda ilk dəfə Azərbaycanın üçrəngli bayrağı qaldırılmışdı.
Hərəkatın başlamasının səbəblərindən biri 1988-ci ilin ilk günlərində Ermənistanın Azərbaycana qarşı açıq təcavüzü hesab edilir. Ermənistan hökumətinin tapşırığı ilə orada yaşayan 200 mindən çox azərbaycanlı öz yurdlarından kütləvi şəkildə qovulmuş, öldürülmüş və diri-diri yandırılmışdır. Buna qarşı sovet hökuməti heç bir reaksiya verməmişdir. 1988-ci ilin fevralında isə ermənilər Azərbaycanın tarixi torpağı olan Dağlıq Qarabağın Ermənistana birləşdirilməsi məsələsini qaldırmışdılar. Buna dözməyən Azərbaycan xalqı etirazlara qalxmışdır.
Dekabrın 4-nə keçən gecə qoşun və zirehli texnikanın tətbiqi ilə mitinq dağıdılmış, 400-ə yaxın etirazçı həbs edilmişdir. Lakin Azərbaycan xalqının milli-azadlıq hərəkatı davam etmiş, respublikanın digər şəhərlərində etiraz aksiyaları keçirilmişdir. Bunun nəticəsi olaraq, üç ildən sonra Azərbaycan xalqı öz müstəqilliyinə qovuşmuşdur.
1992-ci ildə həmin gün rəsmi bayram - Azərbaycanın Milli Dirçəliş Günü elan edilmişdir.
