3 iyul 1994-cü ildə Bakı metrosunun “28 May” və “Gənclik” stansiyaları arasında qatarlarda partlayış baş vermişdir. Hadisə nəticəsində 13 nəfər həlak olmuş, 40-dan çox adam müxtəlif dərəcəli bədən xəsarəti almışdır.
Terror aktını Azər Aslanov törətmişdir. O, Birinci Qarabağ müharibəsi zamanı, Füzuli uğrunda gedən döyüşlərdə ermənilərə əsir düşmüşdür. Aslanov 1994-cü ildə Ermənistanın xüsusi xidmət orqanları tərəfindən əməkdaşlığa cəlb edilmişdir.
Həmin ildə ermənilər Aslanovun anasını onun oğlu ilə görüşdürmək üçün Yerevana dəvət edirlər. Azərin anası, bu təklifi qəbul edərək, Bakıdan Rusiya ərazisini keçərək Yerevana gedir. Ermənilər Azərin anasını girov götürürlər və onun azadlığı müqabilində Azərə Bakı metrosunda terror aktı törətmək tapşırığını verirlər. Azər Aslanovun 1998-ci ildə verdiyi ifadəsinə görə, o, erməni əsirliyində olarkən bu terror aktını həyata keçirmək üçün göstərişi erməni yazıçısı Zori Balayandan almışdır.
Beləliklə, Aslanov saxta sənədlərlə Azərbaycana gəlir, terror aktı törətdikdən sonra isə Ermənistana qayıdır. Sonra onun anası azadlığa buraxılır və onlar Ermənistanı tərk edirlər.
Azər Aslanov 1997-ci ildə Rusiyadan Azərbaycana ekstradisiya olunmuşdur, 1998-ci ildə isə ömürlük azadlıqdan məhrum edilmişdir.
