Müqəddəs Məryəm Ananın Miladi kilsəsi Bakıda, Ş.Əzizbəyov küçəsi, 205-də yerləşir.
Əvvəllər bu məbədin binası başqa yerdə yerləşirdi. İlk kilsə - məktəb binası 1896-cı ildə ianələr hesabına, keçmiş Stanislavski küçəsində (indiki Azadlıq prospekti) inşa edilmişdir. İbadətgah keşiş Aleksandr Yunitskinin təşəbbüsü ilə memar İvan Edelin layihəsi əsasında tikilmişdir. İlk məbəd yerləşdiyi əraziyə görə, “Qanlı təpə kilsəsi” adını daşıyırdı.
Məbəd Bakı Aleksandr Nevski kilsəsinin tabeliyində olan ibadətgahlardan biri kimi fəaliyyətə başlamış, sonralar isə müstəqil olmuşdur. Kilsə Dəmiryol vağzalından C.Cabbarlının abidəsinə qədər ərazini tuturdu. [Юницкий А.И. История церквей и приходов Бакинской губернии. (1815-1905 гг.). Баку-1906] [Церковь Рождества Пресвятой Богородицы (Кани-Тапинская) — OurBaku]
Kapitan Qavriil Bartoşeviç və həyat yoldaşı məktəbə 1814-cü ildə Neva çayında aşkar edilmiş Müqəddəs Məryəmin ikonasını bağışladılar. 1897-ci ildə kilsədə yeni qızılı xaç quraşdırılmışdır. [Газета «Каспий». 1897 г. №28]
Məktəb dərslərinin və ibadətlərin bir binada birləşdirilməsi narahatlıq yaradırdı, bu səbəbdən ayrıca məktəb binasının tikintisinin əsası qoyuldu. 1906-cı ildə kilsədə artıq iki məktəb var idi: iki və bir sinifli. [Газета «Каспий». 1896 г. №135] [Вся промышленность г. Баку на 1906 г.: справочный ежегодник.]
Sovet hakimiyyəti dövründə, 1925-ci ildə Sabunçu dəmir yolu stansiyasının tikintisi ilə əlaqədar kilsə söküldü. Lakin 1926-cı ildə bolşeviklər dindarlara sökülən kilsənin yerinə yeni kilsə tikməyə icazə verdilər. Bu bina keçmiş Verxnaya Priyutskaya (indiki Əzizbəyov küçəsi) küçəsində inşa edilmişdir. [Церковь Рождества Пресвятой Богородицы (Кани-Тапинская) — OurBaku]
Kilsədə 1999-2001-ci illərdə yenidənqurma işləri aparılmışdır. Burada pravoslav ədəbiyyatı ilə zəngin kitabxana, uşaqlar üçün bazar günü məktəbi, həmçinin ehsan yeməkxanası fəaliyyət göstərir. [https://baku-eparhia.ru/church/birth/]
[URIS id=106945]
