Bir vaxtlar indiki Əmək və Əhalinin Sosial Müdafiəsi Nazirliyinin binasının yanında milyonçu H.Z.Tağıyevə məxsus mülk mövcud olub. Quba (Füzuli) meydanı ilə Kömürçü meydanı arasında yerləşən bu beşmərtəbəli bina XIX əsrin sonlarında dəyirman kimi inşa edilmişdir. Lakin sonralar tikili başqa məqsədlər üçün istifadə olunmuşdur.
Deyilənlərə görə, məsələ belə baş verib: dəyirmanın inşası başa çatanda şəhərin hörmətli ağsaqqalları Hacının yanına gəlirlər. Ona şikayətlənirlər ki, həbs edilmiş qohumları Nargin (Böyük Zirə) adasındakı həbsxanada saxlanılır, qayıqlarla oraya gedib-gəlmək çox çətindir. Hacıdan xahiş edirlər ki, kömək etsin. Hacı vəd edir ki, bu barədə fikirləşər. [Qılman İlkin. Köhnə Bakını tanıyırsanmı. Bakı-2004]
Bu barədə digər bir rəvayət də var. Bakıya yüksək rütbəli təzə məmur təyin edilir. Hacı onun görüşünə gedir və deyir ki, sizə nə kömək lazımdırsa, utanmayın, söyləyin. Yüksək rütbəli şəxs izah edir ki, “dustaqları Nargin adasında saxlayırıq, işçilər gedib-qayıtmağa çox vaxt sərf edirlər, həm də əziyyət çəkirlər; mümkünsə, bu işdə bizə kömək edin”. [Манаф Сулейманов. Дни минувшие. Баку-1990]
Nəticədə Hacı belə qərara gəlir ki, təzə tikilib başa çatan dəyirman binasını dustaqxana kimi hökumətə versin. Bu hadisədən sonra məhbuslar Böyük Zirə adasından həmin binaya köçürülürlər. 1919-cu ilə qədər bu yer Mərkəzi İstintaq Həbsxanası adlanırdı. Beləliklə, camaat Narginin ağır şəraitindən xilas edildi. Hətta əvvəllər Sibirə göndərilən dustaqların da bir hissəsi cəzalarını şəhər qazamatında çəkirdilər. [Qılman İlkin. Köhnə Bakını tanıyırsanmı. Bakı-2004] [А. Гасымов. О преобразовании мест отбывания наказаний в первые годы советской власти в Азербайджане// "Закон и право" 2010.-No 6]
“Bakı keçmişdə və indi” adlı kitabda bu haqda məlumat verilirdi: “Maraqlıdır ki, hədiyyə verənin özü də bu həbsxanada həbs olunmalı idi, lakin milyonçuya rəğbət bəsləyən çar buna imkan vermədi, onu əfv etdi və Tağıyev səxavətli hədiyyəsinin cazibədarlığını və rahatlığını yaşamağa müvəffəq olmadı”. [Баку в прошлом и настоящем. Краткий путеводитель-справочник по городу Баку. Составитель А. С. Львов]
1930-cu ildən sonra binada karamel fabriki yerləşdirilmişdir. 1970-1980-ci illərdə təmir işlərindən sonra tikili yaşayış binasına çevrilmişdir. [Мельница Г.З.А.Тагиева - Центральная тюрьма - Карамельная фабрика (Баку) — OurBaku]
