11 yanvar dünya şörhətli şahmatçı Vüqar Həşimovun anım günüdür.
Vüqar Qasım oğlu Həşimov 1986-cı il iyulun 24-də Bakıda anadan olub.
O, 2002, 2004, 2006 və 2008-ci illərin Şahmat Olimpiadalarında Azərbaycan yığmasının tərkibində çıxış edib. 2009-cu ildə Azərbaycan yığmasının heyətində Avropa Çempionu adını qazanıb. Dəfələrlə 1958-ci ildən İtaliyada müntəzəm olaraq keçirilən Recco-Emiliya şahmat turnirinin qalibi olub. O, üçqat Azərbaycan çempionu tituluna sahib idi. Həşimov FİDE-nin 2011-ci ilin mart ayına olan reytinq siyahısında Teymur Rəcəbovu bir pillə qabaqlayaraq 11-ci yerdə qərarlaşıb.
Vüqar Həşimovun şahmatdan başqa pianoya da marağı olub. Poeziyanı sevib. Boş vaxtlarında futbol və böyük tennis oynayıb. Vüqar Həşimov fenomen yaddaşa malik olub. O dünya tarixini, coğrafiyasını, musiqisini, idmanını və 7-dən çox xarici dili mükəmməl bilib.
2011-ci ildə Həşimovun beynində bədxassəli xərçəng şişi aşkarlanıb. Ölümünə məhz bu səbəb olub. O, 2014-cü ildə cəmi 28 yaşında gözlənilmədən Almaniyanın Heydelberq klinikasında vəfat edib.
14 yanvar 2014-cü ildə Respublika Şahmat Mərkəzində mərhumla vida mərasimi təşkil olunub, həmin gün II Fəxri Xiyabanda dəfn edilib.
2014-cü ilin aprel ayından, Şəmkirdə Vüqar Həşimovun xatirəsinə həsr olunmuş beynəlxalq şahmat turniri təşkil edilir. Bu turnirdə Maqnus Karlsen, Fabiano Karuana, Şəhriyar Məmmədyarov, Teymur Rəcəbov, Sergey Karyakin, Hikaru Nakamura kimi dünya səviyyəli şahmatçılar iştirak edir. 2016-cı ildə Bakıda Qrosmeyster Vüqar Həşimov Şahmat Akademiyası fəaliyyətə başlayıb.
