Bakıda qadın İnstagram-a görə onu döyən ərini bağışlayıb. Bu haqda 29 iyun tarixində Oxu.az məlumat verib.
Xətai rayonunda aprelin 14-də 34 yaşlı Əli şəxsi münasibətlər zəminində arvadı Bahara (adlar şərti verilib) xəsarət yetirib. O, qəsdən arvadının üz nahiyəsinə yumruqla vurub, onu döyərək müxtəlif dərəcəli bədən xəsarətləri yetirib.
Əli barəsində Cinayət Məcəlləsinin “Qəsdən sağlamlığa xəsarət yetirmə” maddəsi ilə ittiham irəli sürülüb.
“Birgə nikahdan 2 azyaşlı övladımız var. Yoldaşım ilə əvvəllər mehriban yaşasaq da, son zamanlar onun İnstagram işlətməsi üstündə aramızda tez-tez ailə-məişət zəminində mübahisələr yaranırdı, sonuncu dəfə dava zamanı mən ona müxtəlif xəsarətlər yetirdim. Daha sonra Bahar evdən çıxaraq getdi. Əməlimdən peşmanam. Baharla barışmışam”, - Əli öz ifadəsində bildirib.
Məhkəmə hökm çıxaran zaman təqsirləndirilən şəxsin zərərçəkmişlə barışmasını, zərərçəkmişin ondan şikayətçi olmamasını nəzərə alıb.
Bu səbəbdən cinayətə xitam verilib və o, cinayət məsuliyyətindən azad edilib.
