Bakının Nəsimi rayonunda odlu silah-sursat satmaq istəyən şəxs saxlanılıb. Bu haqda bu gün, 9 yanvar tarixində Bakuplus.az Daxili İşlər Nazirliyinə (DİN) istinadən xəbər verir.
Rayon Polis İdarəsinin 19-cu Polis Şöbəsi əməkdaşlarının keçirdikləri tədbirlər nəticəsində üzərində qanunsuz olaraq odlu silah-sursat gəzdirən, əvvəllər məhkum olunmuş paytaxt sakini, 62 yaşlı Əziz Zeynalov saxlanılıb.
Baxış zamanı onun üzərindən “Makarov” markalı tapança, 16 ədəd patron və 2 sandıqça aşkarlanaraq götürülüb. Zeynalov silah-sursatı bir neçə ay bundan əvvəl əldə etdiyini, lakin polisə təhvil verməyərək satmaq məqsədilə özündə saxladığını bildirib.
Faktla bağlı araşdırmalar davam edir.
