Paytaxtın Xətai rayonu Cavanşir və Sadıqcan küçələrinin kəsişməsindəki şam ağaclarının quruması ilə bağlı araşdırma aparılıb və tikinti şirkəti cərimələnib. Bu barədə 18 oktyabr axşam saatlarında Trend məlumat paylaşıb.
Dövlət Ekoloji Təhlükəsizlik Xidmətinin rəsmisi Vaqif Cavadovun sözlərinə görə, həmin ərazinə baxış zamanı ağacların quruması qeydə alınıb. Səbəbini müəyyən etmək məqsədilə ağacların dibindən torpaq nümunələri laboratoriya analizinə göndərilib.
Araşdırma zamanı məlum olub ki, "RS Construction" MMC tikinti şirkəti aparılan inşa işləri zamanı ağacları qanunsuz olaraq köçürərək bitkilərin qurumasına səbəb olub. Şirkətə qarşı protokol tərtib edilib. Xətai Rayon Məhkəməsinin qərarına əsasən şirkət 15.000 manat cərimə edilib.
