Bakıda ana və iki uşağın ölümü ilə bağlı təfərrüatlar məlum olub. Bu haqda 21 fevral tarixində 1news.az məlumat verib.
Nizami rayonu, “8-ci kilometr” qəsəbəsində fevralın 20-si Sabirabad rayon sakinləri 39 yaşlı Gülnar Qaraxanova, onun övladları 14 yaşlı Lamiyə Qaraxanlı və 11 yaşlı Ataxan Qaraxanlı kirayə yaşadıqları evdə kəsici-deşici alətlə qətlə yetirilmişdirlər.
Qətlə yetirilən Gülnar Qaraxanovanın əri TIR sürücüsüdür. Qaraxanovanın bacısının əri, 41 yaşlı Əhəd Əliyev baldızının ərinin ölkə xaricində olmasından istifadə edərək pul oğurlamaq məqsədilə cinayət törədib. Onun 23.000 manat borcu olub. Çıxış yolu kimi, Əliyev qohumunu öldürmək və əldə etdiyi pulla borcunu bağlamaq istəyib. Həmin şəxsin evdən apardığı pulun bir hissəsi olan 20.000 manat ondan dəlil kimi aşkar edilərək götürülüb.
Həmin gün, axşam saatlarında qətlə yetirilən qadının uşaqlarının səsini eşidən qonşular qapını açmağa çalışıblar. Buna nail ola bilməyincə, onlar polisə müraciət ediblər. Hadisə yerinə gələn polis əməkdaşları bunun ailə münaqişəsi olduğunu, içəri girməyə haqları olmadığını, qonşuların dağılmasının daha yaxşı olduğunu deyiblər. Polis gedəndən az sonra qışqırıqlar kəsilib. Səhər saatlarında qadının və iki azyaşlı uşağının öldürüldüyü məlum olub.
Əhəd Əliyev DİN əməkdaşları tərəfindən Quba ərazisindən ölkəni tərk edərkən saxlanılıb. Faktla bağlı Nizami rayon prokurorluğunda Cinayət Məcəlləsinin "İki və ya daha çox şəxsi öldürmə" maddəsi ilə cinayət işi başlanılıb. Məlum olub ki, o, təxminən 2007-ci ildən 2014-cü ilə qədər Sabirabadda məktəb direktoru vəzifəsində çalışıb.
“Daxili İşlər Nazirliyində bu qətl hadisəsi ilə bağlı xidməti yoxlama aparılır. Xidməti yoxlama zamanı polis əməkdaşlarının hər hansı fəaliyyətsizliyi, yaxud səhlənkarlığı ilə əlaqəli hansısa məqam üzə çıxarsa, dərhal müvafiq qaydada tədbir görüləcək”, - DİN Mətbuat xidmətinin rəisi, polis polkovniki Ehsan Zahidov bildirib.
