Bakının Nizami rayonu Bəkir Çobanzadə küçəsində 14 fevral saat 22:00 radələrində xəsarətlərlə nəticələnən yol qəzası baş verib. Bu haqda bu gün, 15 fevral tarixində Qafqazinfo məlumat verir.
Həmin küçədə 81 saylı marşrut üzrə hərəkət edən avtobus 2 piyadanı vurub. Zərbənin gücündən piyadalar qarşıdan gələn “Saipa” markalı avtomobilin üstünə düşüblər.
Nəticədə 33 yaşlı Amin Budaqov aldığı xəsarətlərdən hadisə yerində ölüb. Digər piyada, 44 yaşlı Rəsul Tomayev isə xəstəxanaya çatdırılıb.
Avtobusun sürücüsü Arif Ələsgərov barəsində Nizami Rayon Polis İdarəsində cinayət işi başlanılıb, araşdırma aparılır.
81 saylı marşrut xəttini istismar edən "Çinar-Trans" MMC-nin direktoru İsmayıl Hüseynov bildirib ki, hadisənin təfərrüatları araşdırılır, kamera görüntüləri götürülüb: “Şirkətimizə məxsus “Karsan” markalı avtobusun kamera görüntüləri götürülüb. Sürücünün bildirdiyinə görə, hadisə vaxtı saatda 30-40 kilometr sürətlə hərəkətdə olub və piyadalar qəfil onun qarşısına çıxıblar”, - deyə Hüseynov əlavə edib.
