Paytaxtın Xətai rayonunda 2 azyaşlıya qarşı quldurluq etmiş dəstə üzvləri saxlanılıblar. Bu haqda bu gün, 10 noyabr tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Xətai RPİ əməkdaşlarının keçirdikləri əməliyyat-axtarış tədbirləri nəticəsində bu cinayəti törətməkdə şübhəli bilinən Oruc Abbasov və daha 3 yetkinlik yaşına çatmayan şəxs saxlanılıblar.
İstintaq zamanı müəyyən edilib ki, Oruc Abbasovun rəhbərlik etdiyi dəstə üzvləri müxtəlif vaxtlarda metronun “Əhmədli” stansiyasının yaxınlığında 2 nəfəri saxlayıb, zərərçəkmişlərdən 800 və 300 manat dəyərində mobil telefonlarını talayıblar.
Oruc Abbasov və digərləri ilə bağlı faktlarla əlaqədar toplanmış materiallar Xətai RPİ-nin İstintaq Şöbəsinə göndərilib.
Bu şəxsin qanunsuz əməllərindən zərər çəkən başqa vətəndaşlar varsa, bu barədə Xətai RPİ-yə, yerli polis orqanlarına, “102” DİM-ə və Daxili İşlər Nazirliyinin sosial şəbəkələrdəki rəsmi səhifələrinə məlumat verə bilərlər.
