Bakıda dələduz avtomobil alverçiləri peyda olublar. Bu barədə Avtosfer.az zərərçəkmiş Yusub Məmmədova istinadən məlumat verib.
O, dekabrın 3-də elektron etibarnamə ilə 12.000 manat ödəyərək 77-EM-468 dövlət nömrə nişanlı “Toyota Prius” markalı avtomobil aldığını iddia edir.
Lakin 2 gündən sonra etibarnamənin saxta olduğu məlum olub: “Maşını mənə satan Bayramov Şahid və Ağayev Anar dedilər ki, mülkiyyətçi yataq xəstəsi olduğu üçün notariusa gələ bilmir. Ona görə elektron etibarnamə verəcəyik. Bununla razılaşdım və 12.000 manatı verərək maşını aldım.
2 gündən sonra etibarnamənin mərkəzi informasiya sistemində görünmədiyi üçün notariusa yaxınlaşdım və araşdırmadan sonra məlum oldu ki, maşını satan şəxslər etibarnaməni saxtalaşdırıblar. Bundan sonra maşının mülkiyyətçisi olan Həsənəliyev İman İsgəndər oğlunu tapdım və onun yataq xəstəsi olmadığının, məni aldatdıqlarının şahidi oldum.
Həmin şəxs bildirir ki, maşını onlara günlük icarəyə verib. Məni aldadan Bayramov Şahid və Ağayev Anar adlı şəxslərdən pulumun geri qaytarılmasını tələb etdim. Onlar bildirdilər ki, maşının pulundan 3400 manat bizə çatıb. Yerdə qalan məbləği maşının satılmasını istəyən İmamverdiyev Cavad İmamverdi oğluna veriblər. Bu məsələdə maşının mülkiyyətçisi olan İman Həsənəliyevin də həmin şəxslərlə əlbir olmasından şübhələnirəm”, - deyə zərərçəkmiş Yusub Məmmədov bildirib.
O bildirib ki, hadisə ilə bağlı Daxili İşlər Nazirliyinin “102” qaynar xəttinə və 20-ci Polis Bölməsinə ərizə ilə müraciət edib.
Zərərçəkmiş Daxili İşlər Nazirliyinin rəhbərliyindən dələduzların qısa bir zamanda tapılaraq məsuliyyətə cəlb edilməsini, həmçinin ondan alınan pulların qaytarılmasını xahiş edir.
