Bakıda ögey anasını qətlə yetirməkdə təqsirləndirilən Günay Məmmədova və onun həyat yoldaşı Həmzə Verdiyev müvafiq olaraq 16 və 19 il müddətinə azadlıqdan məhrum ediliblər. Bu haqda bu gün, 5 mart tarixində Report məlumat verib.
Məhkəmə prosesi Bakı Ağır Cinayətlər Məhkəməsinin hakimi Novruz Kərimovun sədrliyi ilə keçirilib.
25 mart 2021-ci il tarixində Binəqədi rayon sakini, 42 yaşlı Baxşəliyeva Qərənfilin itkin düşməsi barədə Binəqədi rayon Polis İdarəsinə məlumat daxil olub. Sonradan müəyyən edilib ki, Baxşəliyeva qəsdən öldürülüb.
İstintaqın məlumatına görə, qətl hadisəsi zərərçəkmişin ögey qızı Günay Məmmədova və onun həyat yoldaşı Həmzə Verdiyevlə şəxsi münasibətlər zəminində yaranan mübahisə nəticəsində baş vermişdir. Məmmədova əri ilə əlbir olaraq martın 25-də yaşadıqları evdə cinayət törətmək və öz ögey anasını balta ilə qətlə yetirmək qərara gəlmişdir. Daha sonra onlar Baxşəliyevanı öldürərək meyitini Qaradağ rayonu ərazisindəki gölməçəyə atmışdırlar.
Hadisə ilə bağlı cinayət işi açılmışdır, əlbirlər saxlanılmışdır.
