Bakı şəhəri, Nəsimi rayonunun “Papanin” və “Kubinka” kimi tanınan ərazilərində polis əməkdaşları tərəfindən əməliyyat tədbirləri həyata keçirilib. Bu haqda bu gün, 21 mart tarixində Bakuplus.az Daxili İşlər Nazirliyindən verilən məlumata istinadən xəbər verir.
Tədbir zamanı qeyd olunan ünvanlarda narkotik vasitələrin qanunsuz dövriyyəsi və satışı ilə məşğul olan Murad Baxşıyev, Murad İsmayılov, Soltan Nuriyev, Orxan Nuriyev, Aydın Allahverdiyev, Rəşid Nuriyev, Pərvin İsmayılov və Nizami Mürsəlov saxlanılıblar. Onlardan iki kiloqrama yaxın heroin, metamfetamin və tərkibində qanunsuz psixotrop maddələr olan həblər aşkar edilərək götürülüb.
Saxlanılan şəxslər iddia edirlər ki, sosial şəbəkələr vasitəsilə onlar Seyyad adlı İran vətəndaşı ilə tanış olub ondan narkotik vasitələri internet vasitəsilə satmaq məqsədilə alıblar. Həmçinin müəyyən edilib ki, saxlanılan şəxslərdən bəziləri gənclər və yeniyetmələr arasında narkotik vasitələrin fəal şəkildə təbliğatı ilə məşğul olublar.
Toplanmış materiallar Nəsimi RPİ-nin istintaq şöbəsinə göndərilib. Saxlanılan şəxslər barəsində məhkəmənin qərarı ilə həbs qətimkan tədbiri seçilib, əməliyyat-istintaq tədbirləri davam etdirilir.
