Paytaxtın Nərimanov rayonunda yerləşən “Nəşvə” restoranında qaz təchizatı borc ödənilmədiyinə görə dayandırılıb, lakin iaşə müəssisəsinin rəhbəri qanunsuz olaraq boruları yenidən qoşub. Bu haqda bu gün, 12 fevral tarixində Azəriqaz İB-nin mətbuat xidməti məlumat yayıb.
Restoranın qaz təchizatı 5753 manat debitor borcun obyekt sahibi tərəfindən ödənilməməsinə görə dayandırılıb. İki gün sonra “Azəriqaz” İB əməkdaşları tərəfindən ünvana yenidən baxış keçirildikdə məlum olub ki, abonent dəmir ötürücü quraşdıraraq təbii qazdan qanunsuz istifadə edib.
“Azəriqaz” işçiləri restoranın mətbəxinə baxış keçirmək istəyərkən, onları bir müddət girişdə gözlədib, sonra içəri buraxıblar. Kafenin əməkdaşları qaz balonundan istifadə etdiklərini iddia etsələr də, mətbəxə baxış zamanı təkrar qoşulma yerində dəmir ötürücünün abonent tərəfindən açılaraq götürüldüyü aşkar edilib.
