Xəzər rayonu, Türkan qəsəbəsində “İmam Hüseyn” məscidi qarşısında nəzir yığan şəxsə qarşı soyğunçuluq edənin məhkəməsi başa çatıb. Bu barədə Qafqazinfo 9 dekabr tarixində məlumat verib.
Xəzər Rayon Məhkəməsinin hökmünə əsasən, 34 yaşlı Ağakərim Məmmədovun (soyad şərtidir) azadlığı 1 il 10 ay 6 gün müddətinə məhdudlaşdırılıb.
Ötən il avqustun 9-da Rzali adlı gözdən əlil məscidin önündə sədəqə yığan zaman Ağakərim ona yaxınlaşıb və 10 manatı xırdalamasını istəyib. Rzali həmin vaxt ona pulları tanımadığını və xırdalaya bilməyəcəyini deyib. Ağakərim də pula ehtiyacı olduğundan əlini qəflətən onun şalvarının sol cibinə salıb və cibində olan 1 manatlıq əsginaslardan ibarət pulları götürərək qaçıb. Bu, cəmi 30 manat olub.
Ağakərimin özü də əvvəllər Rzaliyə bir neçə dəfə sədəqə verib.
Hadisədən sonrakı gün polislər Ağakərimi görüntü kamerası vasitəsilə müəyyənləşdiriblər və saxlayaraq Xəzər RPİ 1-ci PŞ-yə gətiriblər. O, orada törətdiyi cinayət əməlini səmimi olaraq etiraf edib.
Əlavə edək ki, zərərçəkmiş şəxsin 1992-ci ildən gözləri görmür və 1-ci qrup əlildir. O, məhkəmədə ona dəymiş ziyanın ödənilmədiyini, bu səbəbdən Ağakərimdən şikayətçi olduğunu bildirib.
