Nəsimi rayonunda narkotiklərin satışını təşkil edən daha bir motokuryer saxlanılıb. Bu haqda bu gün, 11 iyul tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Nəsimi Rayon Polis İdarəsinin 22-ci Polis Şöbəsinin əməkdaşları tərəfindən aparılan əməliyyat tədbirləri nəticəsində narkotiklərin qanunsuz dövriyyəsi ilə məşğul olan Rövşən Fətəliyev saxlanılıb. Dindirilmə zamanı o, narkotikləri Nihad adlı şəxsdən aldığını bildirib.
Nəticədə 29 yaşlı Nihad Eminli də saxlanılıb. Onun üzərində və yaşadığı mənzildə 1 kiloqrama yaxın satış məqsədilə əldə etdiyi marixuana, çətənə kolları və 272 ədəd psixotrop tərkibli satışı qadağan olunan preqabalin həbi aşkar olunub.
Eminli sosial şəbəkələr köməyi ilə həmin vasitələri gənclərə satmaq niyyətində olub. O, özünü kuryer şirkətlərindən birinin əməkdaşı kimi təqdim edərək idarə etdiyi motosikletlə narkotiklərin daşınmasını təşkil edib.
Faktlarla bağlı cinayət işləri açılıb. Araşdırmalar davam edir.
