Bakının Nəsimi rayonu, 20 Yanvar küçəsində yerləşən ət kəsimi məntəqəsində qəssab müştərini borca görə döyərək ət yerindən asıb. Bu haqda bu gün, 24 iyul tarixində Bakuplus.az Milli.az-a istinadən məlumat verir.
32 yaşlı Yusub Cəlalov (ad-soyad şərti) Elsəvərə (şərti) bu ilin may ayında 180 manat dəyərində nisyə ət verib. Borcunu qaytara bilmədiyi üçün Elsəvər qəssaba iyul ayında 100 manata saat satıb. Lakin saat işləmədiyi üçün Yusub onu geri qaytarmaq istədiyini bildirib. Bu səbəbdən kişilər arasında mübahisə yaranıb.
Qəssab müştəridən 180 manat borcunu ödəməsini tələb edib. Müştəri isə ətə görə 180 manat yox, 60 manat borcu olduğunu deyib. Bundan qəzəblənən Yusub Elsəvəri döyüb və ət yerindən asıb.
Məsələ ilə bağlı Elsəvər polisə müraciət edib, faktla bağlı araşdırmalara başlanılıb. Məhkəmə Yusubu İnzibati Xətalar Məcəlləsinin 157-ci maddəsində nəzərdə tutulmuş inzibati xətanı törətməkdə təqsirli biliərək, 300 manat məbləğində cərimə edib.
