"Metropark" ilə üzbəüz binadan ev almaq istəyən qadın aldanılıb. Bu haqda 17 iyun tarixində Bakuplus.az Lent.az-a istinadən xəbər verir.
Paytaxt sakini Fəridə Quliyeva Nərimanov rayonunda "Metropark" ilə üzbəüz binada kreditə ev almaq üçün qohumu Qızılgül Musayevaya 2018-ci ildə ilkin olaraq 15.000 manat pul verib. Daha sonra o, həmin şəxsə hər ay 2000 manat pul ödəyib.
2020-ci ildə isə Q. Musayeva F. Quliyevaya həmin binadan ev əvəzinə iaşə obyekti almağı məsləhət görüb və ondan əlavə 15.000 manat pul alıb. Bunda bir müddət sonra aldadıldığını başa düşən F. Quliyeva polisə müraciət edib. Polis əməkdaşlarının keçirdikləri əməliyyat-axtarış tədbirləri nəticəsində dələduzluq edən Qızılgül Musayeva saxlanılıb. Fəridə Quliyeva ümumilikdə 92.000 manatlıq dələduzluğa məruz qalıb. Dəymiş ziyan tam olaraq zərərçəkmişə ödətdirilib.
Musayeva dələduzluqla əldə etdiyi pulu qızıl alveri ilə məşğul olan tanışına verərək, xaricdən qızıl gətirib baha qiymətə satmaq istəyib.
Faktla bağlı araşdırma aparılır.
