Nizami rayonunda polisdən qaçan sürücü tualetdə gizlənib. Bu haqda bu gün, 15 iyul tarixində Bakuplus.az Qafqazinfo-ya istinadən xəbər verir.
Polislər nömrəsi olmayan motosikleti saxlamaq istəyən zaman sürücü tabesizlik göstərib və ərazidən uzaqlaşmağa çalışıb. Təqib olunan motosikletçi restoranlardan birinin qarşısında dayanaraq iaşə obyektinə daxil olub və tualetdə gizlənərək qapını arxadan bağlayıb. Restoran əməkdaşlarının və polislərin cəhdlərindən sonra motosikletçi içəridən çıxıb.
“Mən kuryerəm, verilmiş sifarişi çatdırırdım. Əvvəlcə polisin “saxla” işarəsini görmədim, polisdən qorxduğuma görə onlara qarşı tabesizlik etmişəm, lakin əməlimdən peşmanam”, - deyə 29 yaşlı A.R. bildirib.
Məhkəmənin qərarı ilə saxlanılan şəxs 150 manat cərimə edilib və məhkəmə zalından sərbəst buraxılıb.
