Bakının Xəzər rayonunda kişi arvadına işgəncə verib. Bu haqda bu gün, 31 iyul tarixində Bakuplus.az Lent.az-a istinadən məlumat verir.
40 yaşı olan yerli sakin Cinayət Məcəlləsinin “Əzab vermə, təqsirkar şəxs üçün aşkar surətdə yetkinlik yaşına çatmayan, habelə köməksiz vəziyyətdə olan şəxsə qarşı törədildikdə” maddəsilə ittiham olunur.
Onun müxtəlif səbəblərə görə arvadına işgəncələr verdiyi bildirilir. Belə ki, qadının döyülməsi ilk dəfə ərindən 100 manat gizlədiyinə görə baş verib.
Həyat yoldaşları arasında növbəti münaqişə qadının telefon zənginə cavab verməməsi səbəbindən yaranıb. Bundan əsəbiləşən kişi evə gələrək arvadını evin həyətində soyundurub və əllərini toyuq hininə bağlayıb. Çıxarılan paltarı ağzına dolduran kişi onu döyməyə başlayıb. Qadın aldığı zərbələrdən huşunu itirib. Lakin kişi onu özünə gətirib və döyməyə davam edib.
Cütlüyün bir övladının olduğu bildirilir.
Qadın ərinin hərəkətindən polisə şikayət edib. Bu şikayətdən sonra tədbir görülüb və vətəndaş barəsində müvafiq maddə ilə cinayət işi başlanıb. İstintaq zamanı tərəflər arasında barışıq əldə olunub. Təqsirləndirilən şəxs barəsində ev dustaqlığı qətimkan tədbiri seçilib.
Hazırda Xəzər Rayon Məhkəməsində iş üzrə istintaq davam etdirilir.
