Bakının Xəzər rayonu, Binə qəsəbəsində quldurluq hadisəsi baş verib. Bu haqda bu gün, 14 mart tarixində Bakuplus.az Daxili İşlər Nazirliyinə (DİN) istinadən xəbər verir.
Polis şöbəsinə verilən məlumata əsasən, gecə saatlarında naməlum şəxs yol ilə hərəkət edən yük avtomobilinin qarşısını kəsərək sürücüyə kəsici alətlə xəsarət yetirib və onun pulunu oğurlayıb.
Xəzər RPİ 3-cü Polis Şöbəsi əməkdaşlarının keçirdikləri tədbirlər nəticəsində əməli törətməkdə təqsirli bilinən, əvvəllər oğurluq, eləcə də narkotik vasitələrin dövriyyəsi ilə bağlı cinayətlərə görə məhkum olunmuş Tariel Məmmədov saxlanılıb.
Araşdırmalar zamanı məlum olub ki, saxlanılan şəxs daha öncə də qəsəbədə bir neçə avtomobilin yan şüşələrini sındıraraq içərilərindən bank kartları, pul vəsaitləri, həmçinin maqnitofon və digər əşyalar oğurlayıb.
Faktla bağlı araşdırma aparılır.
