Bakıda yarımçıq tikili çöküb. Hadisə Keşlə qəsəbəsində baş verib. Bu haqda BakuPlus.az APA-ya istinadən 24 fevral tarixində xəbər verir.
Məlumata əsasən, hadisə "City Garden" layihəsinin inşa olunan binalarından birində baş verib.
İlkin məlumatlara əsasən, dağıntı altında qalanların olduğu ehtimal edilir.
14:05 - Yenilənib
Hadisə nəticəsində 4 nəfər xəsarət alıb. Bu haqda Report məlumat verib. “Kristal Abşeron” şirkətindən bildirilib ki, tikilməkdə olan texniki binanın konstruksiyasında dəyişiklik olduğundan, tikilinin ikinci mərtəbəsi şirkət tərəfindən sökülərək uçurdulub.
14:36 - Yenilənib
Layihəyə əsasən, 27 hektar ərazidə ikimərtəbəli ticarət mərkəzinin tikilməsi planlaşdırılırdı. Hadisə yerində təcili tibbi yardım briqadası, prokurorluq, DİN və FHN əməkdaşları işləyirlər. İlkin məlumata əsasən, ölən yoxdur. 4 nəfər xəsarət alıb və xəstəxanaya yerləşdirilib.
16:29 - Yenilənib
Bu gün, Keşlə qəsəbəsində yarımçıq tikilinin çökməsi nəticəsində xəsarət alan 4 nəfər artıq evə buraxılıb.
Yaralananların hər birinə ambulator tibbi yardım göstərildikdən sonra evə buraxılıblar.
