Bakının Nəsimi rayonunda keyfiyyətsiz yuyucu vasitələrin satışının qarşısı alınıb. Bu haqda bu gün, 4 may tarixində Bakuplus.az Daxili İşlər Nazirliyinə (DİN) istinadən xəbər verir.
Polis şöbəsinin əməkdaşları tərəfindən keçirilən tədbirlər nəticəsində Tural Müseyibov, Vüsal Xankişiyev, Şamil Elçiyev, Elnur Aslanov, İlqar Əhmədov və Yaşar Osmanov saxlanılıblar.
Saxlanılan şəxslər Abşeron rayonunun Saray qəsəbəsində yerləşən gizli sexdə xarici ölkələrin tanınmış əmtəə nişanlarından istifadə edərək keyfiyyətsiz yuyucu vasitələri hazırlayaraq paytaxt ərazisində və ölkənin müxtəlif rayonlarında istehlakçıları aldadaraq satışa çıxarıblar.
Sexə və satış yerlərinə baxış zamanı xeyli sayda “Perwoll”, “Peros”, “Fairy”, “Domestos”, “Ariel”, “Ace”, “İpək”, “Elidor”, “Head & Shoulders” və s. əmtəə nişanlı qablaşdırma üçün hazırlanmış məhsullar, saxta məhsulların hazırlanması üçün nəzərdə tutulan avadanlıqlar, xammal, qablaşdırma materialları və etiketlər aşkar olunaraq götürülüb.
Aparılan ekspertiza nəticəsində təmizləyici vasitələrin strandartlara uyğun olmadığı və onların tərkibinin əhalinin sağlamlığı üçün ziyanlı olduğu məlum olub.
Faktla bağlı araşdırmalar davam etdirilir.
[caption id="attachment_137204" align="alignnone" width="640"]
Foto DİN[/caption]
