Sabunçu rayonu, Maştağa qəsəbəsində yerləşən Respublika Psixiatriya Xəstəxanasının şöbə müdiri saxlanılıb. Bu haqda bu gün, 6 fevral tarixində Bakuplus.az Azərbaycan Respublikası Baş Prokurorluğunun mətbuat xidmətinə istinadən məlumat verir.
Baş prokuror yanında Korrupsiyaya qarşı Mübarizə Baş İdarəsi tərəfindən həyata keçirilmiş əməliyyat-axtarış tədbirləri nəticəsində Səhiyyə Nazirliyinin “Respublika Psixiatriya Xəstəxanası” publik hüquqi şəxsin şöbə müdiri Hüseyn Seyidov barəsində həbs qətimkan tədbiri seçilib. Ona qarşı iddialara əsasən, Seyidov müalicə almayan şəxslərdən tibbi sənədlərdən çıxarışların verilməsi müqabilində rüşvət alıb.
Faktla bağlı Hüseyn Seyidova qarşı “Vəzifə səlahiyyətlərindən sui-istifadə”, “Təkrar rüşvət alma” və “Vəzifə saxtakarlığı” maddələri ilə ittiham irəli sürülüb. Məhkəmənin qərarı əsasında ona qarşı həbs qətimkan tədbiri seçilib. İstintaq tədbirləri davam etdirilir.
