Səbail rayonunda yerləşən şadlıq sarayına bitişik qanunsuz obyekt inşa olunur. Bu haqda bu gün, 25 aprel tarixində Bakuplus.az İctimai TV-yə istinadən xəbər verir.
4 mərtəbədən ibarət tikili birbaşa piyada səkisinin üzərində inşa olunub.
Dövlət Şəhərsalma və Arxitektura Komitəsindən bildirildi ki, qeyri-yaşayış obyekti özbaşına tikilir və bununla bağlı müvafiq qurumlara məlumat verilib. Səbail RİH-dən də şifahi olaraq dedilər ki, sözügedən ünvana baxış keçirilib, iş icraçılarına xəbərdarlıq edilib.
Memar Dilqəm İsmayılov bildirir ki, belə layihələr paytaxt ərazisində çoxdur və bu məsələ tənzimlənməlidir:
“Çox güman ki, bu tip layihələr şəhərsalma komitəsinə çatmadan kiçik formatda RİH-lər tərəfindən icra edilir və yaxud onlara göz yumulur. Bunun da səbəbi məhz koordinasiyasızlıqdadır. Əslində idarəetmə bir az fərqli olmalıdır; əgər RİH-lər hansısa kiçikformatlı belə obyektlərin tikinti icazəsini verirsə, bunlar Baş plana uyğun olmalıdır. Çünki baş plan da artıq təsdiqlənib. Baş plan üzrə həmin o kiçik rayonların müfəssəl planları olmalıdır”, – deyə memar qeyd edib.
Millət vəkili Razi Nurullayev isə qanunsuz tikintilərlə bağlı cərimələrin artırılmasının tərəfdarıdır.
Hazırda icazə alınmadan tikinti obyektlərinin inşa edilməsinə görə fiziki şəxslər 800-1000 AZN, vəzifəli şəxslər 2500-4000 AZN, hüquqi şəxslər isə 20.000-25.000 AZN-ə qədər cərimə edilir.
