Nizami rayonu, Q.Qarayev prospektində tanımadığı şəxsə və polisə yaxınlaşaraq sərxoş halda zarafat edən şəxs saxlanılıb. Bu haqda bu gün, 11 fevral tarixində Qafqazinfo məlumat verib.
İsmayıllı sakini E.Fərəcov dostu ilə kafedə yeyib-içdikdən sonra bir avtomobilin yol polisi tərəfindən saxlanıldığını və sürücü barəsində protokol yazıldığını görüb.
İttihama görə, bu zaman o, sürücüyə yaxınlaşaraq onunla danışmağa və zarafatla onu ələ salmağa başlayıb. Səki ilə hərəkət edən şəxsin aidiyyəti olmadığı halda onlara yaxınlaşaraq maneə törətməsinə görə polis əməkdaşı E.Fərəcova irad tutub. O, xidmət fəaliyyətini pozduğunu bildirib. Bu zaman sərxoş kişi polislə mübahisə edib, onun poqonlarını dartaraq qoparıb.
Hadisə ilə bağlı E.Fərəcov Nizami RPİ 25-ci bölməsinə aparılıb. O, İnzibati Xətalar Məcəlləsinin “Polisin qanuni əmrinə tabe olmama” maddəsi ilə təqsirli bilinərək inzibati qaydada 10 sutka müddətinə həbs edilib.
