Bakının Sabunçu rayonu, Bakıxanov qəsəbəsində sakinlər 20 ildir təhlükə altında yaşayırlar. Bu haqda bu gün, 19 dekabr tarixində Bakuplus.az ATV News-a istinadən xəbər verir.
Sözügedən binanın zirzəmisi içməli su ilə doludur və oradan elektrik nəqilləri keçir. Sakinlərin sözlərinə görə, onlar artıq 20 ildir bu vəziyyətdə yaşayırlar və hər an elektrik cərəyanının təhlükə törədəcəyindən qorxurlar.
“İstilik xətləri suyun içində olduğuna görə evlərə istilik getmir, liftimiz buxar içindədir, kabellərdə gərginlik var deyə heç kim zirzəmiyə girə bilmir”, – deyə sakinlər bildirirlər.
Zirzəmiyə dolan içməli suyun səviyyəsi biraz da qalxsa, yüksəkgərginlikli elektrik naqillərində qısaqapanma ola bilər və faciə baş verə bilər.
Binanın blokunda da vəziyyət pisdir. Quraşdırılan lift artıq Istismar müddətini başa vurub və tez-tez xarab olur.
“İçməli su qıtlığı yaşayırıq, amma zirzəmiyə içməli su axır. 20 ildir vəziyyət belədir”, – deyə sakinlər əlavə ediblər.
Məsələ ilə bağlı “Azərsu” ASC-nin mətbuat xidmətinin rəhbəri Anar Cəbrayıllı su xəttinin təmir işlərinin gələcək zamanda başlanacağını bildirib.
Bakı Lifttəmir İstehsalat Birliyi isə liftin yaxın vaxtlarda təmir olunacağı barədə məlumat verib.
