Sabunçu rayonu, Savalan qəsəbəsində məktəbli qız qızılcadan vəfat edib. Bu haqda bu gün, 1 fevral tarixində Bakuplus.az Qafqazinfo-ya istinadən xəbər verir.
Ayla adlı azyaşlı 28 saylı tam orta məktəbin 7-ci sinfində təhsil alırdı.
Təhsil ocağından bildirildi ki, şagirdin ölümünə səbəb ona vurulan iynədən komaya düşməsidir.
“Qızılcanın sürətlə yayılması ilə bağlı iddialar isə doğru deyil. Dərslərimiz öz qaydasında davam edir. Hər gün bununla bağlı məlumat idarəyə ötürülür”, – deyə məktəbdən əlavə ediblər.
Tibbi Ərazi Bölmələrini İdarəetmə Birliyindən (TƏBİB) isə məsələ ilə bağlı bildirilib ki, 14 yaşlı məktəbli Məhəmmədi modul tipli xəstəxanaya ağır vəziyyətdə yerləşdirilib. Onun huşu qaranlıq, dərin intoksikasiya əlamətləri qeyd olunub.
Həkimlərin səylərinə baxmayaraq, onun həyatını xilas etmək mümkün olmayıb.
