Bakı sakini elana aldanaraq dələduzluqla qarşılaşıb. Bu haqda 18 iyun tarixində Oxu.az məlumat verib.
Bakı sakini V.Ə. boru almaq istəyib və saytların birində tikinti materiallarının daha ucuz qiymətə satışı haqda məlumatı görərək, yerləşdirilən nömrə ilə əlaqə saxlayıb. Özünü Loğman kimi təqdim edən şəxs materialın Goranboy rayonunun Dəliməmmədli şəhərində olduğunu bildirib və yaxın müddətdə Bakıya gətiriləcəyini deyib.
“Mənə dedilər ki, Bakıya gələn maşın var və sürücü ilə məni əlaqələndirdilər. Sürücü dedi ki, maşında yer var və əlavə qazanc üçün materialı gətirə bilər. Elə inandırıcı danışdılar ki, mən də inandım. Malı satan şəxsə ödənişi Bakıda bir nəfər tanışına verə biləcəyimi bildirdim. O, razılaşmadı və ödənişi karta köçürməyi xahiş etdi. Mən də karta 1000 manat pul yüklədim”, - deyə zərərçəkən bildirib.
V.Ə sürücü ilə əlaqə saxlayıb və malı götürmək üçün ünvana gedib, lakin əraziyə çatdıqda, həmin adama zəng çatmayıb.
Şikayətçi Xətai Rayon Polis İdarəsinə müraciət edib və faktla bağlı araşdırma aparılır.
