Bakının Suraxanı rayonu, Samir Əliyev küçəsində təxminən bir hektarlıq zeytun bağının yarı hissəsi demək olar ki yandırılıb. Bu haqda ATV Xəbər reportaj təqdim edib.
Ərazidə yaşayan sakinlərin sözlərinə görə, məişət tullantılarının yandırılması ağaclara da ziyan vurub. Burada illərdir yaşıllıqların bir addımlığında məişət tullantıları yandırılır. Bəzən alov o qədər güclü olur ki, zeytun bağlarına da ziyan vurur. Bərk külək əsəndə isə yaşıllığı tüstü- duman bürüyür. Bu səbəbdən zeytun bağı tamamilə məhv olmaq üzrədir.
Sakinlər həmçinin əlavə edib ki, məişət tullantıları vaxtı-vaxtında aparılmır. Ərazidə məişət tullantıları bəzi qonşular tərəfindən yandırılır.
Suraxanı rayonunun Bülbülə qəsəbəsi üzrə nümayəndəsi Elçin Seyfullayev də yaranan vəziyyətə görə yaxınlıqda yaşayan sakinləri günahlandırıb və qeyd edib ki, tullantılar bəzi məsuliyyətsiz sakinlər tərəfindən yandırılır. Məişət tullantılarının vaxtında daşınması ilə bağlı isə o bildirib ki, bu məsələni araşdırmaq üçün adıçəkilən əraziyə baxış keçiriləcək.
[URIS id=48157]
