AMEA İqtisadiyyat İnstitutunun icraçı direktoru Müşfiq Atakişiyevin vaxtilə rektoru olduğu Təfəkkür Universitetinin prorektoru Tariyel Əhmədovun 2011-ci ildə qətlini sifariş etdiyi üzə çıxıb. O, vəzifədən çıxarılaraq həbs edilib. Bu haqda bu gün, 16 noyabr tarixində Bakuplus.az Baş Prokurorluğun mətbuat xidmətinə istinadən məlumat verir.
Prokurorluqdan verilən məlumata görə, cinayət hadisəsinin baş verdiyi vaxt qeyd olunan təhsil müəssisəsinin rektoru vəzifəsində işləmiş Müşviq Atakişiyevin zərərçəkmiş şəxs Tariyel Əhmədovu işgüzar nüfuzuna və rektor vəzifəsində qalmasına maneə kimi qəbul etməsi, bu səbəbdən qisas məqsədilə pul müqabilində onun öldürülməsini öz qohumu Dəyanət Quliyevə sifariş verməsi, sonuncunun isə həmkəndlisi Samir Quliyevlə birgə cinayət əməlini törətməsinə əsaslı şübhələr müəyyən edilmişdir.
Atakişiyev sifarişçi qismində, Samir Quliyev isə icraçı qismində məsuliyyətə cəlb olunublar. Məhkəmənin qərarı ilə Müşviq Atakişiyev barəsində vəzifədən kənarlaşdırılmaqla həbs, Samir Quliyev barəsində isə həbs qətimkan tədbiri seçilib.
