Türkan qəsəbəsində sakinləri narahat edən problem İcra hakimiyyəti tərəfindən həll olunub. Bu haqda 14 may tarixində Bakuplus.az Bizim.media-ya istinadən xəbər verir.
Bir neçə gün əvvəl Türkan qəsəbəsində tullantılarla bağlı xəbər işıqlandırılmışdır. Qəsəbədə zibil qutularının olmaması səbəbindən sakinlər məişət tullantılarını küçəyə atmaq, işıq dirəklərindən asmaq məcburiyyətində qalırdılar. Bununla da natəmizlik yaranırdı və ərazini pis qoxu bürüyürdü. Sakinlər bildirirdilər ki, zibil qutuları yalnız Türkan icra nümayəndəliyi və qəsəbə bələdiyyəsinin binaları qarşısında qoyulur.
Problem ictimailəşəndən sonra Xəzər Rayon İcra Hakimiyyəti məsələ ilə bağlı yerli strukturlara tapşırıqlar verib. Türkan bələdiyyəsinin rəsmisi Akif Əliyev bildirib ki, qəsəbənin küçələrindəki məişət tullantıları təmizlənib, əraziyə yeni zibil qutularının yerləşdirilməsi ilə bağlı icra hakimiyyətinə müraciət edilib.
“Bundan sonra da bütün küçələrdən zibillərin daşınması təmin olunacaq. Sakinlər tərəfindən əvvəllər daş karxanası olan böyük ərazi də zibilliyə çevrilmişdir. Oranı da təmizlətmişik. Günah bir az da sakinlərin özündədir. Yaxınlıqda zibil qutuları ola-ola, məişət tullantılarını küçənin ortasına qoyub fotosunu çəkirlər”, - deyə Akif Əliyev gileylənib.
Türkan qəsəbəsinin əhalisi 12.000-dən çoxdur.
