Bakının Xəzər rayonu, Binə qəsəbəsinin Atçılıq yaşayış massivində yerləşən 292 nömrəli orta məktəbi yenidən diqqət mərkəzinə düşüb. Məktəbin nə direktoru, nə də müavini var. Bu səbəbdən də müəllimlər tədris prosesinə məsuliyyətsiz yanaşırlar. Bu haqda bu gün, 30 noyabr tarixində Bakuplus.az Baku TV-yə istinadən məlumat verir.
Valideynlər iddia edirlər ki, direktor və onun müavini olmadığından məktəbdə özbaşınalıq hökm sürür, bəzi müəllimlər məktəbliləri döyür, təhqir edir, hədələyir, bir çox müəllimlər isə qısa ətək geyindirir və bununla da məktəbliləri korlayırlar.
Öz növbəsində məktəb direktorunu müvəqqəti əvəz edən Gülşən Məhərrəmli bildirib ki, müəssisədə çalışan bütün müəllimlər imtahanlarda yüksək bal toplayıblar.
“Müəllimin şagirdi döyməsi ilə bağlı məlumat hələlik polis tərəfindən təsdiqini tapmayıb. Valideynlər istədiklərini deyə bilərlər. Direktor və onun müavini vəzifələrinə təyinatlar Elm və Təhsil Nazirliyi tərəfindən imtahanların nəticələrinə əsasən, şəffaflıq şəraitində həyata keçiriləcək”, – deyə Məhərrəmli vurğulayıb.
Daha öncə 292 saylı orta məktəbin şagirdlərinin hər gün dərsə kütləvi şəkildə velosipedlə gedib-gəlməsi sosial şəbəkələrdə geniş müzakirə olunub.
Cari ilin mart ayında isə məlum olub ki, yeni istifadəyə verilmiş 292 nömrəli məktəbə valideynlər övladlarını elektron sistem vasitəsilə qeydiyyatdan keçirə bilməyiblər.
