Bakının Yasamal rayonunda tıxacda qalan xanımın halı pisləşib. Onu yol polisi müşayiət edib və o, vaxtında dərman qəbul etməyi bacarıb. Bu haqda öz Facebook hesabında bu gün, 19 dekabr tarixində təhsil məsələləri üzrə mütəxəssis, ictimai şəxs Elçin Əfəndi yazıb.
Hadisə A.M.Şərifzadə küçəsində qeydə alınıb. Əfəndi DYP avtomobilinin mülki avtomobilin yanında saxladığını görüb. Əvvəlcə o, sürücünün qaydanı pozduğunu və polis tərəfindən təqib edildiyini düşünüb.
“Bu an mülki avtomobildən bir nəfər gənc xanım düşdü. O, demək olar ki, yeriyə bilmirdi. DYP əməkdaşı xanıma kömək edərək yaxınlıqdakı binaya daxil olmasına yardım etdi. O gələnədək mülki avtomobilin sürücüsündən nə baş verdiyini soruşdum. Dedi: “Xanımın anidən halı dəyişdi. Böyrəyindən sancı tutdu. Dedi: “Evə çatdırın məni, dərmanlarım var, təcili içməliyəm”. Yol tıxac olduğu üçün çarəsiz idim. Bir qədər irəlidə DYP əməkdaşını görüb yaxınlaşdım və vəziyyəti izah etdim. İlk qərar xəstəxanaya aparmaq oldu, amma xanım israr etdi ki, onu evinə çatdırım. O da bizə yardım üçün yolu aça-aça gətirdi”, – Əfəndi paylaşımda yazıb.
O, polisin adını soruşsa da, demədi.
Hadisə ilə bağlı Daxili İşlər Nazirliyinin mətbuat xidmətinin rəisi Elşad Hacıyev də paylaşım edib. O, Əfəndiyə minnətdarlıq bildirərək həmin polisə də təşəküür ediləcəyini qeyd edib.
