Paytaxtın Suraxanı rayonu, Yeni Günəşli qəsəbəsi, V massivi, bina 13M-in həyətində torpağın sürüşməsi nəticəsində çatlar yaranıb. Bu haqda bu gün, 29 dekabr tarixində Bakuplus.az Qafqazinfo-ya istinadən məlumat verir.
Sakinlər bildirirlər ki, yoldan keçən maşınlar səhər saatlarında çuxurlara düşüblər.
“Yaranan çökəkliklərdən əlavə uzunluğu 100 metrdən çox olan bir çat yaranıb ki, bu, 4 bloklu binanın 1-ci blokunun yanından keçir. Çat və çökəkliyə görə artıq oradan avtomobil hərəkəti dayanıb. Sakinləri olaraq binanın sürüşəcəyindən çox narahatıq. Yaranan çalaların altı tunel kimidir, yəni boşluqdur. Artıq 1-ci blokun da bəzi sütunlarında çatlar yaranıb.
Binada 322 mənzil var. Qəfil çökmə olsa, bu qədər insanın taleyi necə olacaq? Düzdür, bu problem artıq 2 ildir var, lakin son zamanlar sanki daha da sürətlənib. Həmçinin zəlzələdən sonra daha da artıb. Bu barədə Suraxanı Rayon İcra Hakimiyyətinə və Fövqəladə Hallar Nazirliyinə məlumat vermişik. Heç bir tədbir görülməyib, elə baxış keçirib gediblər”, – deyə sakinlər bildiriblər.
Fövqəladə Hallar Nazirliyindən (FHN) bildirildi ki, əraziyə baxış keçirilib, binanın yükdaşıyan konstruksiyalarında çat və zədələnmələr aşkar olunmayıb. Hazırda sahədə işlər davam edir, geoloji tədqiqat aparılır. İşlər yekunlaşdıqdan sonra nəticələr baxılmaq üçün aidiyyəti qurumlara göndəriləcək.
