Sabunçu rayonu, Yeni Ramana qəsəbəsində ağaclar məhv edilir. Bu haqda bu gün, 28 mart tarixində Bakuplus.az Real TV-yə istinadən xəbər verir.
İddia olunur ki, kimliyi məlum olmayan kəslər bəzi ağacları yandırıb, onlarla ağacı kəsiblər. Bəzi sahələrdəki ağaclar isə tam çıxarılıb. Sakinlər bildirirlər ki, ağaclar məqsədyönlü məhv edilir və burada yaşayış evlərinin inşa olunması nəzərdə tutulur.
“Bura Ramana yaxınlığında gəziləcək ən yaxşı yerlərdən biridir. Bir neçə il əvvəl buradakı bəzi yerlər ağaclıq idi. İndi bura evlərdir. Hazırda digər əraziləri də məhv etmək istəyirlər”, – deyə sakinlər şikayət edirlər.
Onlar ağaclıq sahədə park salınmasını istədiklərini vurğulayıblar.
Bakı Şəhər Yaşıllaşdırma Təsərrüfətı Birliyindən deyilib ki, ərazi ting sovxozudur və paytaxtda əkilən güllər burada yetişdirilir. Bu səbəbdən də ərazidə park salınması məqsədəuyğun deyil.
“İstər-istəməz, ətrafda yaşayan əhali gəlib burada dincəlir, piknik etmək istəyir və yaxud başqa məqsədlərlə tonqal qalayır, sonra tonqalı söndürmürlər. Tərəfimizdən yanan ağaclar götürülür, yerində münasib ağaclar əkilir”, – deyə qurumdan əlavə edilib.
Kəsilən ağaclarla bağlı isə:
“Burada yalnız yanmış, qurumuş, qocalmış ağaclar var, onlar külək nəticəsində, müxtəlif təsirlərdən quruyub sıradan çıxırlar. Onlar tərəfimizdən kəsilib götürülür”, – deyə qurumdan qeyd edilib.
