Ziya Bünyadov prospektindəki “Taxta bazarı”nda baş vermiş yanğın ərazisində bütün açıq alov mənbələri söndürülüb. Bu haqda bu gün, 23 noyabr tarixində Bakuplus.az Fövqəladə Hallar Nazirliyinin (FHN) mətbuat xidmətinə istinadən məlumat verir.
Hazırda bəzi tüstülənmə mənbələrinin tam söndürülməsi və soyutma işləri davam etdirilir.
11:08 - “Taxta bazarı”ndakı yanğınla bağlı cinayət işi açılıb
Bakının Binəqədi rayonu, Ziya Bünyadov prospektindəki “Taxta bazarı”nda baş vermiş yanğınla bağlı cinayət işi başlanıb. Bu barədə Baş Prokurorluq və Fövqəladə Hallar Nazirliyi birgə məlumat yayıb.
Hadisə zamanı bir neçə sahibkara maddi ziyan dəyib. Həmçinin 61 yaşlı sahibkar Razi Qasımov dünyasını dəyişib.
Faktla bağlı Cinayət Məcəlləsinin “Yanğın təhlükəsizliyi qaydalarını pozma” maddəsi ilə cinayət işi açılıb. Yanğının səbəbini və dəymiş ziyanı müəyyən etmək məqsədilə yanğın-texniki və əmtəəşünaslıq ekspertizaları, Razi Qasımovun ölüm səbəbinin müəyyən edilməsi üçün məhkəmə-tibbi ekspertiza təyin edilib. Hadisə yerində istintaq-əməliyyat tədbirləri davam etdirilir.
10:12 - “Taxta bazarı”ndakı yanğının söndürülməsi üçün əlavə texnika və canlı qüvvə cəlb olunub
Bakının Binəqədi rayonu, Ziya Bünyadov prospektindəki “Taxta bazarı”nda baş vermiş yanğının söndürülməsi məqsədilə əraziyə FHN tərəfindən əlavə texnika və canlı qüvvə cəlb olunub.
Bildirilir ki, bazardakı yanğın artıq məhdudlaşdırılıb. Hazırda alovun tam söndürülməsi üçün əməliyyatlar davam etdirilir.
09:25 - Ziya Bünyadovda “Taxta bazarı” yanır: ölən var – VİDEO
Bakının Binəqədi rayonu, Ziya Bünyadov prospektində “Taxta bazarı” adlanan ərazi yanır. Bu haqda bu gün, 23 noyabr tarixində Bakuplus.az Fövqəladə Hallar Nazirliyinin (FHN) mətbuat xidmətinə istinadən məlumat verir.
Yanğın səhər saat 05:45 radələrində başlayıb. Hadisə yerində FHN, polis əməkdaşları və təcili tibbi yardımın briqadaları işlər aparırlar.
Yanğın nəticəsində şəxsiyyəti müəyyən olunmayan kişi həlak olub. Xəsarət alan yoxdur.
Havanın küləkli olması, ərazidəki yüksəkgərginlikli elektrik xətləri yanğının söndürülməsi işlərini mürəkkəbləşdirsə də, hazırda yanğınla mübarizə tədbirləri davam etdirilir.
FHN-dən verilən məlumata əsasən, küləkli hava yonqarları geniş sahəyə yayıb və yanğın yerində 3 mənbə yaranıb. Hazırda bütün istiqamətlərdə yanğın sahəsi tam əhatəyə alınıb. Alovun yayılmasının qarşısı alınıb. Yanğının sahəsi təxminən 4 min kvadratmetrə yaxındır.
Bildirilir ki, yanğın səbəbindən prospektin köməkçi yolundan metronun “20 Yanvar” və “Koroğlu” stansiyaları istiqamətinə yolda məhdudiyyət tətbiq olunmuşdur. Hazırda köməkçi yolunda məhdudiyyət aradan qaldırılıb.
