Bakıda “Xarıbülbül” Azərbaycan və dünya rəqsləri festivalı keçirilib. Bu haqda BakuPlus.az Azərtac-a istinadən bu gün, 29 aprel tarixində xəbər verir.
Xəzər Rayon Gənclər və İdman İdarəsinin təşkilatçılığı ilə Şüvəlan Mədəniyyət Evində baş tutan festival Beynəlxalq Rəqs Gününə həsr olunub.
Festival çərçivəsində Xəzər rayonu üzrə ümumtəhsil məktəblərinin şagirdlərindən ibarət rəqs kollektivlərinin iştirakı ilə müxtəlif rəqs kompozisiyaları nümayiş olunub.
Tədbirdə Xəzər Rayon Gənclər və İdman İdarəsinin rəisi Vüqar Əliyev, baş məsləhətçi Dilşad Nuriyeva, Şüvəlan Mədəniyyət Evinin direktoru Səma Sadıxova, Mədəniyyət Evinin əməkdaşı Güləndam İskəndərova iştirak ediblər.
Rəqs kompozisiyalarını Əməkdar mədəniyyət işçiləri Dilbər Abdullayeva və Elçin Allahverdiyevdən ibarət münsiflər heyəti qiymətləndirib.
