Bakı Xoreoqrafiya Akademiyasının tam orta məktəbinin şagirdləri Rusiyanın Sankt-Peterburq şəhərində “Klassik və müasir rəqs ifaçılarının beynəlxalq konsert müsabiqəsi”ndə iştirak ediblər. Bu haqda Azərtac xəbər verib.
Anna Pavlovanın anadan olmasının 140 illiyinə həsr olunmuş müsabiqədə 11-ci sinif şagirdləri Liana Bernadina (“Armida Pavilyonu” və “Əbəs yerə ehtiyatlılıq”) və Leyla Dəmirova (“Yatmış gözəl” baletindən Yasəmən pərisi, “Paxita”) baletlərdən variasiyalar ifa ediblər.
Leyla Dəmirova möhtəşəm çıxışına görə 107 ifaçı və 215 rəqs arasında I dərəcəli laureat, Liana Bernadina isə II dərəcəli laureat adına layiq görülüb.
Mükafatlandırma böyük rus balerinası Anna Pavlovanın ev-muzeyində keçirilib.
