Tanınmış aktyor Elçin Həmidov 29 iyun 1958-ci ildə Bakıda anadan olub. Körpə yaşlarından əvvəlcə atasını, sonra isə anasını itirən Elçini və bacı-qardaşlarını əmisi himayəyə götürüb. Bir müddət sonra Elçinin əvvəlcə bacısı, sonra isə qardaşları vəfat edib. 1981-ci ildə Azərbaycan Dövlət İncəsənət İnstitutunun “Dram-kino aktyoru” fakültəsini bitirib.
1983-cü ildən Azərbaycan Dövlət Musiqili Komediya Teatrında artist-vokalist kimi fəaliyyət göstərib. Məlahətli səsə və məharətli aktyorluq bacarığına malik olan Elçin, klassik və müasir Azərbaycan bəstəkarlarının əsərlərində özünəməxsus maraqlı obrazlar yaratmağa nail olub.
Tanınmış sənətçiləri parodiya etməyi isə başqa bir aləm idi. O, gülərüz simaya, əla bədən quruluşuna malik idi, onun ifasında qadın və kişi rolları çox koloritli alınıb. İstedadlı aktyor həmçinin "Planet Parni iz Baku" ŞHK teatrının əsas simalarından biri idi. O, bu teatrda gözəl obrazlar yaradıb. O cümlədən “Məhəllə 1” və “Məhəllə 2” filmlərində canlandırdığı Məzi obrazı komik olmaqla bərabər, həm də düşündürücüdür.
2011-ci il martın 4-də istedadlı aktyor qəflətən dünyasını dəyişib. Həmin vaxt teatrda "Hərənin öz ulduzu" tamaşasının orkestrlə məşqi idi. Elçinin işə gəlmədiyini görən dostları onun evinə gediblər. Fövqaladə Hallar Nazirliyinin işçilərinin köməyi ilə qapı açılıb. Lakin həmin vaxt artıq Elçin Həmidov tək-tənha dünyasını dəyişmişdir. Aktyor martın 5-də Xırdalan qəbiristanlığında torpağa tapşırılıb.
