Bu gün misilsiz istedad və bacarıq sahibi olan Xalq artisti, gülüş ustası Əliağa Ağayevin doğum günüdür. O, 1913-cü ildə Bakıda dünyaya göz açıb.
Azərbaycan tamaşaçısı onu unudulmaz rollarla xatırlayır. Görkəmli aktyorun ilk rolu Mirzə Fətəli Axundzadənin "Hacı Qara" komediyasında Hacı Qara obrazı olub. Ə.Ağayev “Kimdir müqəssir?", “Közərən ocaqlar", "Kəndçi qızı", "Yaxşı adam", "Fırtına", “Füsunkar qız", “Daşqın", “Sevgi... sevgi...", “Kölgələr pıçıldaşır", "Mənziliniz mübarək!", “Söz yarası”, “Görünməmiş toy”, “Dəli yığıncağı” əsərlərində yaratdığı obrazlarla xatırlanır.
“Arşın mal alan”, “Bir məhəllədən iki nəfər”, “Bizim Cəbiş müəllim”, “Dəli Kür”, “Evləri köndələn yar”, “Əhməd haradadır?”, “Görüş”, “Qanlı zəmi”, “Qanun naminə”, “Qara daşlar”, “O olmasın, bu olsun”, “Papaq”, “Şərikli çörək”, “Telefonçu qız” filmləri gülüş ustasının milli kinoda yaratdığı obrazlara aiddir.
Əliağa Ağayev 13 noyabr 1983-cü ildə pərəstişkarları və dostları ilə süfrə arxasında lətifə söyləyib güldüyü yerdəcə gözlərini əbədi qapayıb. O, Yasamal qəbiristanlığında torpağa tapşırılmışdır.
