Bu gün, 9 mart tarixində Xalq rəssamı, Kamil Xanlarovun doğum günü qeyd olunur.
Kamil Əli Abbas oğlu Xanlarov 1915-ci il martın 9-da Bakı quberniyasında Xanlarovların bəylər ailəsində anadan olub. Xanlarov gördüyü işlərə görə Azərbaycan SSR-nin əməkdar artisti (1964), Azərbaycanın xalq artisti (1992) fəxri adlarını alıb.
O, əsasən tarixi mövzularda rəsmlər (“Edamdan əvvəl Məzdək” (1941), “Tovuzda üsyan” (1940) və s.), mənzərə (Zaqatala dağları (1946), Astara (1955), Talış dağları (1956) və s.), portret və tematik pannolar (Sahədə (1963), Ailə (1965), və s.) yaradıb.
Rəssam 1960-ci illərdə Çexoslovakiyaya səfər etmişdir. Əsərlərin arasında Praqada küçə, Karlovı Varıda meydan, Qızıl küçə, Praqada qüllə, Yan Qusun abidəsi kimi işləri qeyd etmək mümkündür.
Kamil Xanlarovun 60 illik yaradıcılıq yolunda yaranan əsərləri Avstriya, Macarıstan, Rumıniya, Almaniya, Misir, İraq, Kanada, Suriya, Norveç, Fransa, Finlandiya, Yaponiya, İran, Əfqanıstan, Türkiyə və Polşada açılan sərgilərdə nümayiş etdirilmişdir.
Kamil Xanlarov, 1996-cı ilin yanvarında Bakı şəhərində vəfat etmişdir.
