Bakı Xoreoqrafiya Akademiyasının tələbələri beynəlxalq müsabiqədə mükafata layiq görülüb. Bu haqda 23 fevral tarixində Bakı Şəhər Mədəniyyət Baş İdarəsi məlumat verib.
Bakı Xoreoqrafiya Akademiyasının şagirdləri Şirin Əmiraslanova, Liana Bernadina, Leyla Dəmirova və “Bakının ulduzları” rəqs ansamblı İsveçin Stokholm şəhərində onlayn formatda “AURORA” ifaçılıq və bədii sənət üzrə II Beynəlxalq Müsabiqədə iştirak ediblər. Onlar “Klassik rəqs” və “Milli rəqs” nominasiyasında yüksək yer tutublar.
Klassik rəqs nominasiyasında “Amurlar”, “Pyatsekato” əsərlərindən “Pas-deux-trois” ilə çıxış edən Liana Bernadina, Şirin Əmiraslanova və Leyla Dəmirova I dərəcəli laureat, “Cəngi” və “Cıdır düzü” rəqs nömrələri ilə müsabiqəyə qatılan akademiyanın “Bakının ulduzları” rəqs ansamblı isə müsabiqənin “Qran-Pri” mükafatına layiq görülüb.
