Sutka ərzində paytaxt ərazisində 3 yanğın hadisəsi qeydə alınıb. Bu haqda Fövqəladə Hallar Nazirliyinin mətbuat xidməti məlumat yayıb.
Ötən gün Bakı şəhərinin Xətai rayonunda ümumi sahəsi 2000 kv.m olan ikimərtəbəli şadlıq sarayında yanğın baş verib. Hadisə zamanı mətbəxin havalandırma sistemində mühərrik və yağ qalıqları, bitişik çoxmərtəbəli yaşayış binasının dördüncü mərtəbəsində qismən 1 ədəd pəncərə çərçivəsi yanıb.
Hadisə yerinə FHN əməkdaşları cəlb olunub. Yanğının geniş əraziyə yayılmasının qarşısı alınıb. Şadlıq sarayı və bitişik bina yanğından mühafizə olunub.
Oxşar hadisə paytaxtın Nəsimi rayonunda qeydə alınıb. Ümumi sahəsi 270 kv.m olan üçmərtəbəli obyektin üçüncü mərtəbəsində yumşaq mebel dəsti yanıb, yüksək temperaturdan 2 ədəd kondisioner və 2 ədəd monitor əriyib. Yanğın FHN əməkdaşları tərəfindən söndürülüb.
Bakının Sabunçu rayonunda baş vermiş digər yanğın nəticəsində "Opel" markalı minik avtomobilinin mühərrik hissəsi yanıb. FHN əməkdaşlarının yanğının söndürməsi ilə avtomobilin qalan hissəsi yanğından mühafizə olunub.
