Bakının Nizami rayonu, Elşən Süleymanov küçəsi, 57 ünvanında yaşayan sakinlər yaşadıqları binanın qarşısında həyətyanı sahədə tikinti işlərinin başlanıldığını bildirdilər. Ərazidə isə 60-a yaxın müxtəlif ağacların olduğunu və tikinti zamanı bu ağacların zərər görə biləcəyi barədə məlumat veriblər. Bu haqda bu gün, 1 oktyabr tarixində Real TV reportaj yayıb.
Sakinlər tikinti aparılan yerin sakinlərin istirahət yeri olduğunu, həmçinin 2 il öncə də oxşar hadisə ilə qarşılaşdıqlarını deyirlər. Torpaq sahəsi hündürmərtəbəli binaların arasında yerləşdiyindən onlar tikintini qanunsuz hesab edirlər. Həmçinin narazı vətəndaşlar qeyd ediblər ki, bu sahədə uşaqlar oynayır, evin yaşlı sakinləri də istirahət edirlər.
Torpaq sahəsində hasar tikən Rövşən Məmmədov bu torpağı xalası oğlundan etibarnamə ilə aldığını, torpağa dair bütün sənədlərinin olduğunu bildirdi: “Bu hasarı vurandan sonra hələ bilmirəm, nə zamansa əgər layihə təsdiq olunarsa, həyətyanı ev tikiləcək.”
Nizami RİH-dən bildirildi ki, Baki şəhərinin Nizami rayonundakı Elşən Süleymanov, 57 ünvanının yaxınlığında sözügedən torpaq sahəsi dövlət qeydiyyat haqqında daşınmaz əmlakın dövlət reyestrindən verilmiş 03.08.2021-ci il tarixli çıxarışına əsasən, vətəndaşın xüsusi mülkiyyətindədir.
Ərazidə yaşıllığın mövcudluğu nəzərə alınaraq aidiyyəti qurumdan müvafiq rəyin olmaması səbəbindən tikinti işlərinin aparılmasının qarşısı alınmışdır.
Azərbaycan Respublikasının Şəhərsalma və Tikinti məcəlləsinə əsasən, mülkiyyətdə, icarədə və ya istifadədə olan torpaq sahəsində hündürlüyü 2,2 metr olan və qonşu torpaq sahəsi ilə sərhəddə və ya küçə boyunca çəkilən hasarlara icazə tələb olunmur.
[caption id="attachment_72554" align="alignnone" width="640"]
Foto Real Tv-nin rəsmi Youtube kanalı[/caption]
