Bakıda eyni mənzilləri bir neçə nəfərə sataraq 172 vətəndaşa ümumilikdə 14 milyon manat ziyan vurmaqda ittiham olunan "Təbriz" MTK-nın rəhbəri Nofəl Hacıyev və şirkətin icraçı direktoru Talış Məhəmmədovun cinayət işi üzrə hökm elan edilib.
Cinayət işinin istintaqı Baş prokuror yanında Korrupsiyaya qarşı Mübarizə Baş İdarəsi tərəfindən aparılıb. Bakı Ağır Cinayətlər Məhkəməsinin qərarı ilə Nofəl Hacıyev 11 il 6 ay müddətinə azadlıqdan məhrum edilib. Talış Məhəmmədova isə yaşı və səhhəti nəzərə alınaraq 1 il sınaq müddəti müəyyən edilməklə 3 il şərti cəza verilib.
Həmçinin məhkəmənin hökmü ilə üzərinə həbs qoyulmuş "Atlant" istirahət mərkəzi müsadirə edilib.
İttihama əsasən, 2018–2022-ci illərdə "Təbriz" MTK-nın tikintisi davam edən binasındakı eyni mənzillər bir neçə vətəndaşa satılıb. Bu yolla 172 nəfərdən ümumilikdə 14 milyon manat əldə edildiyi bildirilir. Vətəndaşlardan alınan vəsaitin "Atlant" istirahət mərkəzinin təmir-tikinti işlərinə sərf olunduğu qeyd edilir.
Xatırladaq ki, Nofəl Hacıyev "Atlant" istirahət mərkəzinin rəhbəri Tahir Qədəşovun kürəkəni və istirahət mərkəzinin şəriklərindən biri olub.
Mənbə: lent.az