Bakı Ağır Cinayətlər Məhkəməsində həyat yoldaşını balta ilə öldürməyə cəhddə təqsirləndirilən İradə Hacıyevanın cinayət işi üzrə növbəti iclas keçirilib.
Prosesdə müdafiə tərəfinin İradə Hacıyevanın ev dustaqlığına buraxılması barədə vəsatəti təmin edilməyib. Onun vəkili ilə birlikdə əyləşməsi barədə vəsatət isə qəbul olunub. İradə Hacıyeva ittihamı qismən qəbul edib. Növbəti məhkəmə prosesi dekabrın 8-nə təyin olunub.
Hadisə 28 iyun 2026-cı ildə Yasamal rayonunda baş verib. İddialara görə, uzun illər məişət zorakılığına məruz qalan İradə Hacıyeva münaqişə zamanı həyat yoldaşı Elşən Hacıyevə balta ilə bir neçə zərbə endirib. Kişi üz, qol və kürək nahiyələrindən ağır xəsarətlər alıb. Evdə olan iki oğlu müdaxilə edərək baltanı anasının əlindən alıb.
İradə Hacıyevaya qarşı Cinayət Məcəlləsinin qəsdən adam öldürməyə cəhd maddəsi ilə ittiham irəli sürülüb və barəsində həbs qətimkan tədbiri seçilib.
Mənbə: lent.az
